Muskurahat Forums

چوری ۔ احمد ندیم قاسمی کا شہرہ آفاق افسانہ

چوری

دن بھر تھانیدار کے لئے جنگل سے لکڑیاں کاٹنے کے بعد غریب منگو گلی کے ایک نکڑ پر دیوار سے پیٹھ لگا کر سستانے کے لئے بیٹھ گیا تھا ۔ اس کی نظریں اپنے پاؤں پر جمی ہوئی تھیں ۔ ایڑیوں میں دراڑیں سی پڑ گئی تھیں اور انگلیوں سے خون پھوٹ کر ناخنوں کے کنارے پر جم گیا تھا ۔ کچھ دیر بعد وہ اٹھا ۔ اس کو اپنے گھر آٹا گوندھنے جانا تھا ۔ اس کی ماں مر چکی تھی اور وہ ابھی تک کنوارہ تھا ۔ ایک جگہ ایک بزرگ کے زریعے کچھ بات چیت کی تھی ۔ لیکن لڑکی والے پانچ سو روپے طلب کرتے تھے ۔ اور اسے پیٹ بھرنے کے لئے پانچ پیسے بھی مشکل سے میسّر آتے تھے ۔ خاموش ہو رہا ۔ اس نے سوچا ۔ ویسے بھی گزر ہو ہی جائے گی ۔ یہی سمجھ لو ں گا کہ شادی کرتے ہی بیوی مر گئی اور میں رنڈوا ہو گیا ۔ پھر بھی کبھی کبھی جب کوئی عورت سر پر گاگریں رکھے۔ اٹھلاتی ہوئی، سینہ تانے اسے کنکھیوں سے دیکھ کر گزر جاتی یا دور کسی مکان کی چھت پر کسی دھوپ سینکتی دوشیزہ کی نظریں اس کی نظروں سے لڑ جاتیں تو وہ اپنی زندگی میں بہت بڑی کمی محسوس کرنے لگتا ۔ لیکن، جلد ہی پیٹ کے دھندوں میں پھنس کر وہ اس تکلیف دہ احساس سے چھٹکارہ حاصل کر لیتا ۔
اس نے دو قدم اٹھائے ۔ اچانک گاؤں سے باہر دور ایک گولا چھوٹنے کی آواز آئی ۔ اس کے کان کھڑے ہو گئے ڈھول اور شہنائیوں کی آوازیں بھی اب صاف سنائی دینے لگیں ۔ ’’ کسی کی بارات آ رہی ہے ! ‘‘ اس نے کہا اور وہ تیز تیز قدم اٹھاتا ہوا س طر ف جانے لگا ۔ اور پھر کنوارے اور رنڈوے تو براتیں دیکھنے کے دلداہ ہوتے ہیں !
اس سے ایک شخص نے پوچھا ۔ ’’ کدھر منگو خیر تو ہے ؟ ‘‘
’’ خیر ہے بھائی ! بس اِدھر ڈُھول کی آ واز آئی ۔ میں نے کہا ۔ چلو رونق میلا ہی دیکھ لیں ۔ کس کی بارات ہے آج ؟ ‘‘
’’ کیا کرو گے پوچھ کر ۔۔۔۔ جھوٹی براتیں ! ‘‘
’’ جھوٹی براتیں ؟ ‘‘ منگو نے متعجب ہو کر پوچھا ۔
’’ہاں جھوٹی براتیں ۔۔۔۔ سچی برات تو ہو گی جس میں تم سہرا باندھ کر گھوڑے پر سوار ہو گے ۔ ! ‘‘
منگو جھینپ گیا ! اور وہ شخص ہنستا ہوا ایک طرف چلا گیا ۔
دور سے اسے بے شمار مشعلیں نظر آئیں ۔ جن میں بار بار کالے کالے ہاتھ کالی کالی صراحیوں سے تیل ڈالتے تھے ۔ آگے آگے علاقے کے مشہور میراثی تھے ۔ دو ڈھول جن سے ریشم اور موتیوں کی لڑیاں لٹک رہی تھیں ۔ دو شہنائیا ں جن کے بندوں پر سونے کا پانی چڑھا ہوا تھا ۔ ایک بین باجا جس کی بے شمار توتیوں سے لٹکتے ہوئے سنہری پھندے جھم جھم کر رہے تھے ۔ میراثیوں کے پیچھے سوار تھے جن کے شملے موروں کی دُموں سے بھی کچھ زیادہ پھیلے ہوئے تھے اور جن کی مونچھیں آسمانوں کی طرف اشارہ کر رہی تھیں ۔
کئی سوار اپنے مریل مریل گھوڑوں کی پسلیوں میں ایڑیاں گھسیڑ گھسیڑ کر انہیں ناچنے یا کم از کم اپنی گردنیں اٹھانے پر مجبور کر رہے تھے، جو نفرت انگیز انداز میں زمین کی طرف جھکی ہوئی تھیں ۔ کئی سوار اپنی خوبصورت بنی ٹھنی گھوڑیوں کو نچانے کی کوشش میں اپنا توازن قائم نہ رکھ سکتے تھے اور چیخ کے اِرد گرد کے لوگوں سے امداد کے طالب ہوتے تھے ۔ اِن کے پیچھے چار اُونٹ تھے ۔ جن کے ماتھوں پر، گھٹنوں پر، گردنوں پر، سینوں پر، موٹے موٹے گھنگھروں کی مالائیں باندھی ہوئی تھیں اور جن پر لدے ہوئے کجاووں میں کئی لڑکیاں بیٹھی تھیں جو اپنے آپ سے شرماتی اور لاج سے سکڑی جاتی تھیں ۔ ان کے گال تمتمائے ہوئے تھے اور ان کے کانوں میں لٹکتے ہوئے بندے جھمر جھمر کر رہے تھے۔ ہوا میں لہراتی ہوئی اوڑہنیو ں کو سنبھالنے کی کوشش میں کئی بار اُڑتی ہوئی پریاں معلوم ہوتی تھیں جو اپنے ارضی محبوب سے مل کر واپس ستاروں کی طرف جا رہی ہوں ۔ کئی ایسی بھی تھیں جو اپنا شباب گزر جانے پر بھی اس طرح اکڑی بیٹھی تھیں جیسے سارے مجمع کی نظر صرف ان پر پڑ رہی ہیں جبکہ ان کی طرف صرف ادھیڑ عمر کے رنڈوے دیکھ رہے تھے ۔ انہوں نے اپنے ہونٹ لال کر رکھے تھے اور بے شمار زیوروں کے بوجھ سے کجاووں میں جھک جھک جاتی تھیں ۔ ان سب کے پیچھے پیدل چلنے والے تھے جن کے سر سراتے ہوئے لباسوں سے عطر کی لپیٹیں آ رہی تھیں ۔ فوجی سپاہیوں کا سب سے بڑا تحفہ عطر ہی تو ہے جس سے وہ لڑکیوں پر اپنا رعب جما سکتے ہیں ۔
منگو بھاگا بھاگا آیا اور دو تین لجاتی لڑکیوں کو گھورتا اور ماتھے سے پسینہ پونچھتا پیدل چلنے والوں میں شامل ہو گیا ۔ جب گولے چھوٹتے تھے اور گھوڑے بدکتے تھے تو برات میں نئی زندگی دوڑ جاتی تھی ۔ جب شہنائی والے سر کو پیچھے لے جا کر شہنائیو ں کا منہ آسمانوں کی طرف کرتے تھے اور ایک لمبی تان کھینچتے تھے اور ادھر سے پھلجھڑیاں تیر کی طرح آسمانوں پر جا کر نیلے، پیلے، سرخ اور سبز شراروں کی شکل میں اپنے پیچھے لکیریں چھوڑتی ہوئی واپس لپکتی تھیں تو یوں معلوم ہوتا تھا جیسے موسیقی کے جادو سے آسمان کے تارے کھچ کھچ کر شہنائیوں میں سما جانے کے لئے اُڑے آ رہے ہیں ۔ منگو کا چہرہ خوشی کی وجہ سے تمتما اُٹھا تھا ۔
برات گاؤں میں داخل ہوئی ۔ لوگ چھتوں پر چڑھ کر سجی ہوئی اور بنی ٹھنی لڑکیوں کو دیکھنے لگے ۔ منگو کے جی میں آئی کہ چلو دُولہا تو دیکھیں ۔ آخر وہ خوش قسمت کون ہے جو ہمارے گاؤں کی لمبے لمبے بالوں اور گلابی گلابی رخساروں والی الھڑ لڑکی کو لینے آیا ہے ۔ وہ تو نظر ہی نہیں آ رہا ۔ وہ پیدلوں کے مجمع کو چیر کر آگے بڑ ھنے ہی والا تھا کہ شور مچ گیا ۔ ’’ میرا بٹوہ ! میرا بٹوہ چوری ہو گیا ۔ ‘‘ ۔۔۔۔ اور اچانک بے شمار ہاتھ منگو کے کاندھے پر پڑے ’’ کدھر بھاگا جا رہا ہے ، بد معاش ، بد ذات ‘‘
منگو نے مڑ کر دیکھا ۔ تیل اور گھی سے چمکتے ہوئے چہروں پر لال آنکھیں ابلی پڑتی تھیں ۔ برات رک گئی اور سارے مجمع نے منگو کو گھیر لیا ۔
تمام برات پر پہلے تو ایک لمحہ کے لئے خاموشی چھائی رہی ۔ پھر اِرد گرد سے سرگوشیوں کی سر سراہٹ اٹھی اور اس کے بعد ایک شخص نے بڑھ کر منگو کو بالوں سے پکڑ لیا ۔ منگو نے ایک لمحہ کے لئے سوچا کہ اس شخص کو کیسے جرأت ہوئی کہ اس نے ایک غیر گاؤں کے نوجوان کو یوں بالوں سے پکڑ لیا ہے ۔ اسے کیسے معلوم ہوا کہ میں غریب آدمی ہوں اور مجھ سے کوئی ہمدردی نہیں کرے گا ۔ اس نے اپنی پھٹی ہوئی قمیص کو دیکھا جس میں اس کی چوڑی چھاتی کے بال نظر آرہے تھے ۔۔۔ اس پر تمام اسرار منکشف ہو گئے ۔
اس شخص نے کڑک کر پو چھا ۔ ’’ کدھر ہے بٹوا ؟ کدھر ہے بٹوا کُتے کے بچے ! ‘‘
منگو کا خون کھول کر آنکھوں کے ڈوروں میں آ گیا ۔ اِسے یہ خیال نہ رہا کہ ایک غریب انسان تمام برات سے مقابلہ نہیں کر سکتا ۔ اس کے بازوؤں کے پٹھے پھڑکنے لگے۔ اس نے گھونسا تان کر اس شخص کے جبڑوں میں جما دینا چاہا مگر سامنے ایک گھوڑی پر اسے گاؤں کا سردار نظر آیا ۔ خیالات برقی سرعت سے اِس کے دماغ کی شریانوں میں گردش کرنے لگے ۔ ’’ مجھے اپنے شہر کے سردار کے آگے فریاد کرنی چاہئے ۔ میں نے کئی بار چوپال پر اس کے پاؤں دبائے ہیں ۔ اس کے گھر کے لئے لکڑیاں کاٹ لایا ہوں ۔ اس کے کاموں پر دن میں تیس تیس کوس پیدل سفر کیا ہے ۔ یہ غیر گاؤں والے میری بے عزّتی کر رہے ہیں ۔ تو اس میں سارے گاؤں کی بے عزّتی ہے ۔ میں نے بٹوا چرایا ہے تو میرے پاس موجود ہونا چاہئے ۔ ‘‘ ۔۔۔ اس نے وہیں سے چیخنا شروع کر دیا ۔ ’’ ملک جی آپ کا اقبال بڑھے مجھے ان بدمعاشوں نے گھیر لیا ہے ‘‘ ۔۔۔ اب اس کے بالوں پر سے مضبوط ہاتھ علیحدہ ہو چکا تھا ۔۔۔ ’’ ملک جی ۔ مجھ پر یہ نا حق الزام دھر رہے ہیں ۔ ملک جی آپ بہت خوب جانتے ہیں ۔ میں نے آج تک چوری نہیں کی ۔ میں غریب ہوں مگر اپنی حلال کمائی سے پیٹ بھرتا ہوں ۔ آپ جانتے ہیں ۔ سارا گاؤں جانتا ہے ۔ خدا جانتا ہے ۔ ‘‘
اس نے اپنی آنکھیں بیحد اشتیاق سے سردار کے چہرے پر گاڑھ رکھی تھیں ۔ وہ منتظر تھا کہ ابھی سردار کے منہ سے گالیوں کا طوفان نکلے گا، برات والوں کے چھکے چھوٹ جائیں گے اور وہ فخر سے اکڑتا ہوا پنے گھر آ کر آٹا گوندھنے لگے گا۔
لیکن سردار کی للکار اس پر بجلی بن کر گری ۔’’ بد معاش، جیب کترے، حرامزدے، تجھے شرم نہیں آتی؟ گھر آنے والوں کی یوں خاطر کی جاتی ہے؟ سارے گاؤں کی ناک کاٹ کر رکھ دی ۔ کدھر ہے بٹوا ؟ نکال اسے، نکال ۔ ‘‘ اب اس کی پیٹھ پر سردار کا پتلا چابک شڑاپ شڑاپ پڑ رہا تھا ۔ ’’ نکال ورنہ تیری مشکیں کس کر اور الٹا لٹکا کر مرچوں کا دھواں دوں گا ، مرچوں کا ۔ ‘‘
’’ حضور ۔ مجھے خدا کی قسم ، مجھے قرآن کی قسم، مجھے ۔ ‘‘
’’ بٹوا نکال ، کہاں رکھا ہے، کس جھاڑی میں پھینکا ہے ؟ کدھر ہے بٹوا ؟ کدھر ہے بٹوا ؟‘‘ ۔۔۔۔ اور ہر جملے پر اس کی پیٹھ پر ایک ایسا چابک پڑتا تھا کہ اس جلد سر سے لے کر پاؤں تک طنبورے کے تاروں کی طرح لرز کر رہ جاتی تھی ۔ لیکن وہ خاموش رہا ۔ اسے معلوم تھا کہ اس کی ایک نہیں سنی جائے گی ۔ خدا اور قرآن ان کی نظروں میں کھلونے ہیں۔ ان پر قسمیں کوئی اثر نہیں کریں گی ۔ جس بوڑھے کا بٹوا گم تھا وہ پاگلوں کی طرح چیخ رہا تھا ۔ ’’ دس روپوں کے سات نوٹ ۔ دس روپوں کے سات نوٹ ۔ دس کم اسی روپے ! لوگو! میں لُٹ گیا ۔ میں نے اس شخص کو تیزی سے بھاگتے دیکھا تھا، یہی میرا چور ہے ۔ ‘‘ بوڑھے کی زبان تیزی سے چل رہی تھی اور اس کے منہ سے جھاگ کے قطرے اُڑ اُڑ کر اس کی گنجان داڑھی میں چمک رہے تھے ۔
سردار کے حکم سے برات آگے بڑھنے لگی اور منگو کو گاؤں کے دو چوکیداروں کے حوالے کر دیا گیا جو اسے چوپال پر لے آئے ۔کچھ دیر بعد سارا گاؤں اور سب بارات والے چوپال پر آ موجود ہوئے ۔ اندھیری رات تھی اور ایک نائی کے ہاتھوں میں ایک مشتعل جل رہی تھی۔ تھانے سے ایک حوالدار اور ایک سپاہی بھی بلائے گئے۔
منگو زمین پر بیٹھا ایک تنکے سے مٹی کرید رہا تھا اور سوچ رہا تھا ’’ جس کمبخت نے بٹوا چرایا ہے وہ مجھ پر رحم کھا کر بٹوا چوپال کے وسط میں کیوں نہیں پھینک دیتا ؟
غریبوں پر لوگ ترس کیوں نہیں کرتے؟ سب میری مُصبیت پر مسکرا کیوں رہے ہیں؟ عجیب بات ہے! عجیب قانون ہے! عجیب سمجھ ہے؟‘‘
وہ اٹھ کر حوالدار کے سامنے آ گیا۔’’ حوالدار جی، میں آپ کے آگے سچی سچی بات کہہ دوں گا۔ آپ کو یقین آ جائے تو خیر، نہیں تو آپ کی مرضی کے آگے میرا کوئی بس نہیں، سارا گاؤں مجھے خوب جانتا ہے، بد قسمتی سے برات دیکھنے چلا گیا، ایک بار خیال آیا، چلو دُولہا تو دیکھ لوں، جانے لگا کہ شور مچ گیا اور سب نے مجھے آن دبوچا۔ میرے تیز قدموں سے انہیں غلطی ہوئی ہے۔ چور ان کا اپنا ساتھی ہو گا۔ ‘‘
حوالدار جی کی جیب بھاری ہو چکی تھی۔ وہ مسکرا دیئے اور سگریٹ کا دُھواں اپنے چوڑے نتھنوں سے نکالتے ہو ئے بولے ۔’’ چوری کرنے والے خود بخود اقبال کرلیں تو سرکار کو ہمارے محکمہ کی ضرورت ہی نہ رہے ۔ تیری ہتھیلوں پر گرم گرم انگارے دھرے جائیں گے۔ تیرے سینے پر پتھر کوٹے جائیں گے ۔ تجھے ہفتہ ہفتہ بھر بھوکا پیاسا حوالات میں بند رکھا جائے گا ۔ تب تو خود بخود پکار ا ٹھے گا ۔’’ حضور بٹوا فلاں جگہ پر پڑا ہے ۔‘‘ برخوردار ، ہم پولیس والے ہیں !‘‘ اور حوالدار نے اپنی گردن کو کچھ اس طرح ٹیڑھا کیا جیسے وہ زمین و آسمان کو حوالات میں بند کر دینے پر قادر ہے!
منگو نے ایک بار سردار کی طر ف دیکھا لیکن اِس کے انداز سے انتہائی بے خبری اور بے توجہی کا اظہار ہو رہا تھا ۔ وہ ایک زمیندار سے گندم کے بھاؤ کے متعلق باتیں کر رہا تھا ۔
حوالدار کے حکم سے سپاہی نے اس کی تلاشی لی ۔ اس کی جیب سے ایک چوّنی نکلی جو اسے لکڑیوں کا گھٹا بیچنے پر ملی تھی ۔ چوّنی حوالدار کی جیب میں کھسک گئی اور اسے کہا گیا ۔
’’ جاؤ ۔ ‘‘ جہاں بٹوا رکھا ہے لے آؤ ۔ ورنہ تمہاری کھال اُتار لی جائے گی ۔۔۔۔ جاؤ ۔ ‘‘
حوالدار نے اپنی آنکھیں یوں نکالیں جیسے ابھی تڑاخ سے باہر آپڑیں گی ۔ تمام مجمع دم بخود کھڑا تھا ۔
’’ جاؤ ۔ ‘‘ حوالدار نے اپنا مو ٹا ڈنڈا منگو کی گردن پر جماتے ہوئے کہا ۔ ’’ کھڑے کیا تک رہے ہو ۔ ‘‘
’’ لیکن حضور مجھے کچھ خبر نہیں ۔ میں کہاں سے لاؤں؟ میں نے بٹوے کا نام تو سن رکھا ہے مگر ابھی تک اس کی شکل نہیں دیکھی ۔ میں غریب آدمی ہوں حضور ۔ ‘‘
’’ لے آؤ بٹوا ۔ جہاں رکھا ہے لے آؤ ۔ جسے دیا ہے لے آؤ ۔ ورنہ ۔ ورنہ ۔ ‘‘ ڈنڈا منگو کی چھاتی پر آن گرا ۔
اس نے ایک کونے میں مسجد کے مولوی صاحب کو دیکھا تو پکار کر کہا ۔ ’’ مولوی صاحب ! دیکھئے نا ۔ میں ۔۔۔۔ ‘‘
’’ مگر بچے چوری بری چیز ہے نا ! ‘‘
وہ اپنی تمام نمازوں کو برباد سمجھنے لگا جو اِس نے امام کے پیچھے پڑھی تھیں ! اسے حوالدار کا ایک اور دھکا لگا ۔ ’’ لے آؤ بٹوا ۔ ‘‘
وہ نا چار سر جھکائے چوپال کی سیڑھیوں سے اُترنے لگا ۔ اس کے پیچھے ایک سپاہی اور دو چوکیدار تھے ۔ اچانک ایک شخص تیزی سے اِس کے قریب سے گزرتے ہوئے بولا ۔ ’’ کیوں جی برات والے یہیں ہیں ؟ ‘‘
’’ ہاں ۔ ’’ منگو نے جواب دیا ۔ شائد وہ بھی کوئی براتی تھا ۔ کیونکہ اس کا کلف لگا شملہ اوپر بہت دور تک چلا گیا تھا ۔
وہ چوپال پر چڑھ گیا اور بولا ۔ ’’ شیر باز ۔ بابا شیر باز یہیں موجود ہو کیا ؟ ‘‘
’’ ہاں ہاں ۔ ‘‘ شیر باز اٹھا ۔۔۔ یہ وہی بوڑھا تھا ۔ جس کا بٹوہ کھو گیا تھا !
میں نے راستے میں سنا کہ تم نے ایک بے گناہ پر بٹوے کی چوری کا الزام دھر دیا ہے حالانکہ تم نے مجھے اپنا بٹوا پکڑایا تھا کہ کہیں بھیڑ میں گم نہ ہو جائے ۔ ‘‘
’’ ارے ۔۔۔ میں تو بھول ہی گیا ۔ تمہارے پاس ہے بٹوا؟ ‘‘ بوڑھے کی باچھیں خوشی کے مارے کانوں کی لوؤں تک پھیل گئی !
منگو کا جسم غصے سے دہکنے لگا ۔ چوکیدار اور سپاہی واپس ہو پڑے مگر اس نے وہیں سے کھڑے ہو کر پوچھا ۔ ’’ میں جا سکتا ہوں ؟ ‘‘
منگو گھر آیا تو اسے اپنی چوّنی کا خیال ستانے لگا۔ ’’ میری دن بھر کی کمائی اس کی جیب میں موجود ہے ۔ یہ کہاں کا قانون ہے ؟ میں اپنی چوّنی ضرور لوں گا ۔ ‘‘ وہ واپس ہو پڑا ۔
چو پال پر پہنچا تو لوگ جا چکے تھے ۔ وہ تھانے کی طرف دوڑنے لگا ۔ ایک کمرے کی کھڑکی کھلی تھی ۔ اندر لیمپ جل رہا تھا ۔ وہ کھڑکی کے پاس چلا گیا ۔ اندر جھانکا تو وہی حوالدار اور سپاہی ایک چارپائی پر بیٹھے شیشے کے گلاس میں کوئی سرخ چیز پی رہے تھے ۔
’’ حضور ‘‘ اس نے آہستہ سے کہا ۔
’’ کون ؟ ‘‘ حوالدار نے پوچھا ۔
’’ حضور میں ۔۔۔ منگو ۔ ‘‘
’’ کیا ہے ؟ ‘‘
’’ حضور ۔اس کا بٹوہ مل گیا تھا نا ؟ ‘‘
’’ ہاں ۔ ‘‘
’’ پھر حضور ۔۔۔ ‘‘
’’ کیا ؟ ‘‘
’’ میری چوّنی مجھے مل جائے ؟ ‘‘
حوالدار اور سپاہی اس زور سے ہنسے کہ حوالات کی سلاخوں سے بھی ایک گونج اٹھنے لگی ۔ منگو ان بے معنی قہقوں پر متعجب ہی ہو رہا تھا کہ کھڑکی کھڑاک سے بند ہو گئی اور دردؔ کی شدت سے وہ اپنی ٹھو ڑی اور ناک کو انگلیوں میں دبا کر رہ گی.